عزيزتي حواء….ابي وزوجي واخي ادم ,عرفين كام مره بتتقال كلمة ماما او مامي أو أمي في البيت؟

صدقوني لو احنا قولنا عشر جمل بشكل عام  في البيت ,هتلاقي تمنيه منهم شامله عارفه ياماما,ماما انا عملت ,شوفتي ياماما,ماما هو فين كذا وهلم جره …..

مبقللش من دور الأب بس ببص على أدوار الأم الكتيره قوي اللي بتعملها بكل حب من غير زهق أو تعب أوتقصير.كمان هو الدور الكامل المتكامل اللي لا يمكن تقصر فيه وعمرك ما هتلاقي حد بيقدم دور بالتكامل ده وبكم الحب و العطاء واحساس المسئوليه الكامله زي دور الأم ….!!!

وادوارالأم كتيره جدا ,بس ابسط طريقه لمعرفتها لو أنت لسه في بداية امومتك أو أنت أب غيران من انك البطل التاني في حياة ولادك انك تروح فصل كاجي وتسأل بنحب مامي اد ايه؟

هتلاقي الصوت علي أقوي والهرجله ملت الفصل والكل بنفس واحد بيقول بنحب مامي قوييييييييييييي. وياسلام لو سألت بنحب مامي ليه؟

هتعرف بجد مامي دي بتعمل حاجات كتيره قوي أد ايه , يمكن حتى بابي مايحسش بيها .

هتلاقي الزهور الصغيره بترد تقول , بنحبك يامامي علشان هي بتذكرلي دروسي أو بتجبلي الأكل لما ابقى جعان , أو بتخدني في حضني لما أبقى خايف و مش عارف أنام,أو بتحميني وتلبسني هدوم جميله, او بتلاعبني حتى لو تعبانه,أولو تعبان بتفضل جنبي لحد ما خف , أو مبتشتريش حاجات لنفسها وتشتري ليه حاجات كتير , أو لما بضحك بتخدني في حضنها على طول , أو بتعملي السندوتش اللي بحبه , أو بحبها و خلاص علشان هي مامي….!!

وحاجات كتير قوي مينفعش نعدها…!!

انا كمان ….. زي الزهور الصغيره وزي الناس الكبيره التانيه بقولك قد ايه انت عظيمه وبقولك بحبك يا أمي …

علشان انت سندي ومهما كبرت والدنيا ضاقت بيه بتهونيها عليه , ومهما كبرت ولو حاولت أكبر عليك بتعديها ليه, ولسه بتحليلي كل مشاكلي ,ولسه مهمومه بيه ومش بس شيله همي وهم بيتي وولادي , وكأنك مش وراكي غير همومي في الدنيا ديه, عيزاني أحسن حد وأحلى حال وبتدني أمل حتى في المحال, وحتى لو قسيتي شويه عليه ديما بشوف في عينك نظرة ود وحب وحنيه ……. بحبك يا أمي .